frau kelef geht fremd, also: nicht zum jimmy ins beisl am eck, sondern unterwegs in ein bislang unbekanntes beisl. und wie sie so mit der kleinen wauwau alleine an einem tisch sitzt, da sitzen am nachbartisch ein paar: nennen wir sie einmal y-chromosomen-träger. weil männer oder herren oder sowas waren die alle nicht. aber nun ja. dafür waren aber alle älteren semesters, hatten zuhause wahrscheinlich nix zu sagen, und da waren die jetzt am meinungs- und erfahrungsaustausch dass es eine freude war.

de hände, de san scho praktesch.

jo. scho.

do konnst ollawäu üwaroi telefoniern.

jo. scho. owa nua wonnst an empfong host. sunst net.

owa sunst scho. des woa friara ondascht. do host zum telefonian a telefon braucht.

dafia homma jetzt de hände. do brauch ma ka telefon mea.

de hände san scho praktisch.

jetzt kennan de scho fotografiean a.

des kennan de scho long. lebst du aufn mond?

na, i waass eh, des kennan de scho long. praktisch. owa a polaroid woa a praktisch, do hot ma a a büdl kriegt, bein fotografiern.

owa de neichn hände de kennen gons vüle sochn. do konnst telefoniern, fotografiern, schreim, und schickn. de san praktisch, so hände.

owa de neichn, de nimma. des san jo kane hände mea, des san mehr so plottn, kwasi.

jo, des san jetzn so plottn. de komma nimma eischteckn.

wo?

na, in de hosntoschna. wo hostn leicht du dei
hände?

in hemmad.

und in summa? wäu do ziag i a leiwal o, des hot kane toschn.

geh, a leiwal, in dein oita!

heast, i bin drei joa jinga ois wia du, do konn i in summa a leiwal trogn.

weng de drei joa?

a leiwal muass mei oide net biagln. wengan wossa, wasst eh.

in leiwal?

na, in de fiass. oiso, in de fiass von meina oidn.

und wos hot des jetzna mit da gress von hände zum tuan?

na, wäu i wü wieda a so a hände wia i ghobt hob, a klaans, wia a telefon hoit ans owa ohne hera, wia a hände hoit ans, dos is in de hosntoschn steckn ko. des konn i mit so ana plottn net.

owa de neichn hände de wos plottn san, de kennan a ins intanet, hot mei bua gsogt.

mei bua sogt des a.

manst, des stimmt?

no heast, wonn mei bua des sogt!

und meine sogt des jo a!

oiso, des stimmt? de plottna kennan ins intanet?

jo, de grossn, de plottna, de kennan ins intanet, wäu wonn denan eanare buam des sogn, donn stimmt des.

konnst scho recht hom.

und wäu des so gross is, konn mas net in de hosntoschn steckn.

wos is so gross? des intanetz?

jo, des eh a. owa de plottna, de wos jetzt de neichn hände san, de erscht recht. vü z'gross fia a hemad- oda a hosntoschn. und ois nua wengan den intanet. zu wos des ana dauand braucht, kennd sie do eh kana mea aus, wonn des so gross is, des intanet.